Poytaxtimizdagi Jahon iqtisodiyoti va diplomatiya universitetida “O‘zbekistonning Jahon savdo tashkiloti (JST)ga a’zo bo‘lishi: qonunchilik va institutsional islohotlar” mavzusida xalqaro ilmiy-amaliy konferensiya o‘tkazildi.
Tadbirda yetakchi ekspertlar, parlament vakillari, JSTga a’zo bo‘lish bo‘yicha ishchi guruh va akademik hamjamiyat ishtirok etdi.
Konferensiyada milliy qonunchilikni JST kelishuvlariga muvofiqlashtirishga qaratilgan qonunchilik islohotlarining dolzarb masalalari, mamlakatning xalqaro savdo tizimiga integratsiyalashuvi, shuningdek, qo‘shilish jarayonini muvaffaqiyatli yakunlash uchun zarur bo‘lgan institutsional o‘zgarishlar muhokama qilindi. Bu jarayonda parlamentning o‘rni, savdo siyosatini shakllantirishda tahlil markazlarining ta’siriga alohida e’tibor qaratildi.
Anjumanni Jahon iqtisodiyoti va diplomatiya universiteti rektori, O‘zbekiston Respublikasi Oliy Majlisi Senati Raisining birinchi o‘rinbosari Sodiq Safoyev hamda Oliy Majlis Qonunchilik palatasi Spikeri o‘rinbosari, Qonun hujjatlarini JST bitimlariga muvofiqlashtirish komissiyasi raisi Rahim Hakimov ochib berdi.
Tadbirda O‘zbekiston Respublikasi Prezidentining JST masalalari bo‘yicha maxsus vakili Azizbek O‘runovning O‘zbekistonning Jahon savdo tashkilotiga a’zo bo‘lish jarayonining asosiy jihatlari xususidagi ma’ruzasi tinglandi. U o‘z nutqida amalga oshirilayotgan islohotlarning ahamiyati, mamlakatimiz iqtisodiy siyosatini xalqaro standartlarga moslashtirish zarurligini qayd etib, bu yo‘lda davlatimiz oldida turgan asosiy vazifalarga to‘xtaldi.
Panel muhokamasi davomida ishtirokchilar tahlil markazlarining savdo siyosatini ishlab chiqish va amalga oshirish, shuningdek, davlat organlari bilan o‘zaro hamkorlik strategiyalarini ko‘rib chiqdi. Yetakchi ilmiy tashkilotlar, jumladan, Parlament ilmiy-tadqiqot instituti, Iqtisodiy tadqiqotlar va islohotlar markazi va boshqa tahliliy tuzilmalar vakillari mavzu yuzasidan o‘z fikr-mulohazalarini bildirdi.
Qizg‘in savol-javoblar tarzda o‘tgan anjumanda ishtirokchilar mamlakatimizning Jahon savdo tashkilotiga a’zo bo‘lishi istiqbollari va muammolarini muhokama qilish imkoniga ega bo‘ldi. Yakuniy xulosalar jahon savdo tizimiga integratsiyalashuv jarayonini muvaffaqiyatli yakunlash uchun qonunchilik bazasini yanada takomillashtirish va mamlakat institutsional salohiyatini mustahkamlash zarurligini tasdiqladi.
Kamola YUSUPOVA, Muhammad AMIN (surat), O‘zA
