Ma’lumki, so‘nggi yillarda O‘zbekiston va Xitoy o‘rtasidagi munosabatlar jadal rivojlanmoqda. Shu jumladan, oliy ta’lim sohasidagi muloqotlar strategik sheriklikning muhim tarkibiy qismi bo‘lib, o‘zaro manfaatli hamkorlikka asoslangan.
Davlatimiz rahbarining 2024 yil yanvar oyida Xitoy Xalq Respublikasiga amalga oshirilgan davlat tashrifi davomida O‘zbekiston bilan Xitoy o‘rtasidagi barcha sharoitlarda har tomonlama strategik sheriklik munosabatlarini mustahkamlashga qaratilgan bir qancha hujjatlar qabul qilingan edi. Tashrif doirasida o‘tkazilgan “O‘zbekiston – Xitoy” birinchi ta’lim forumi esa ikki davlatning 150 ta oliy ta’lim muassasalari rektorlarini bir davraga jamladi.
Forumda qatnashgan O‘zbekiston davlat san’at va madaniyat instituti Xitoy Xalq Respublikasining bir qator oliy ta’lim muassasalari bilan hamkorlik kelishuvlariga erishgan edi. Ushbu kelishuvlarni institut imkoniyati va ta’lim yo‘nalishlariga moslagan holda qayta ko‘rib chiqish hamda yangi hamkorlik aloqalarini o‘rnatish maqsadida institut rektori, professor Nodirbek Sayfullayev rahbarligidagi delegatsiya Xitoyda xizmat safarida bo‘lib qaytdi.
Safar davomida vakillarimiz Xitoyning 5 ta nufuzli oliy ta’lim muassasasida bo‘lib, bir qancha hamkorlik kelishuvlari o‘rnatishga erishdi. Shuningdek, delegatsiya ishtirokida Pekin Ipak yo‘li madaniy almashinuv markazida uchrashuv o‘tkazildi.
Dastlab Tianjin chet tillari universitetida rektor, professor Li Yingying bilan samimiy muloqot o‘tkazilib, hamkorlik kelishuvi imzolandi. Shuningdek, hamkorlikda pesalar yaratish va sahnalashtirish masalasi ham muhokama qilindi.
Ta’kidlash joiz, ushbu universitet yurtimizning 28 ta oliy ta’lim muassasasi bilan hamkorlik shartnomalarini imzolagan. Umumiy hisobda esa 60 ta davlatdan 350 ta oliy ta’lim muassasasi bilan aloqa o‘rnatgan.
Hamyurtlarimiz ushbu oliy ta’lim muassasasida yo‘lga qo‘yilgan o‘quv jarayonlari, talaba va professor-o‘qituvchilar uchun yaratilgan sharoitlar bilan yaqindan tanishdi.
Keyingi manzil Tianjin san’at va media kolleji bo‘ldi.
Ushbu muassasada ijrochi direktor Li Xiaohua boshchiligidagi oliy ta’lim muassasasi vakillari bilan uchrashuv o‘tkazilib, ikki tomonlama hamkorlik aloqalarini o‘rnatish, birgalikda amalga oshiriladigan turli tadbirlar masalasi muhokama qilindi, hamkorlik kelishuvi imzolandi.
Safar davomida vakillarimiz shuningdek, Tyanjin musiqa konservatoriyasi, Xebey kommunikatsiya universiteti, Xitoyning shimoliy-sharqida joylashgan Jilin xalqaro ta’lim universitetlarida bo‘lib, mavjud aloqalarni hamkorlik kelishuvlari bilan mustahkamlash, ilmiy-ijodiy yo‘nalishda istiqbolli loyihalarni amalga oshirishga kelishib oldi. Shu bilan birga ular, ushbu oliygohlarda o‘quv jarayonlariga tadbiq etilgan zamonaviy ta’lim texnologiyalari bilan ham yaqindan tanishib, tajriba orttirdi.
Delegatsiya vakillarining Pekin Ipak yo‘li madaniy almashinuv markazi hammuassisi Elli Ma xonim bilan uchrashuvi ham samarali bo‘ldi.
Ma’lumki, Prezidentimiz Shavkat Mirziyoyev raisligida joriy yilning 16 yanvar kuni investitsiyalarni keng jalb etish va eksport hajmini oshirish borasidagi ishlar natijadorligi va kelgusidagi asosiy vazifalar muhokamasi yuzasidan o‘tkazilgan videoselektor yig‘ilishida berilgan topshiriqlar ijrosini ta’minlash har bir oliy ta’lim muassasasi oldidagi ustuvor vazifalardan biri hisoblanadi. Uchrashuvda ayni shu jihatlarga e’tibor qaratildi.
Markaz mutasaddilari xitoylik talabalar hamda magistrantlar uchun O‘zbekistonda o‘qishni tashkil etish masalasini ko‘rib chiqishga tayyor ekanligini ma’lum qildi.
Ma’lumot o‘rnida ta’kidlash kerak, Pekin Ipak yo‘li madaniy almashinuv markazi ta’lim sohasida 20 yildan ortiq vaqt davomida faoliyat olib borayotgan bo‘lib, xitoylik yoshlarni AQSH, Yevropa va Osiyoning nufuzli oliy ta’lim muassasalarida o‘qishini tashkillashtirish, shuningdek, boshqa davlatlar yoshlarini Xitoy oliygohlarida tahsil olishiga ko‘maklashish bilan shug‘ullanadi.
Xitoyga safar institutning xalqaro aloqalarini yangi bosqichga olib chiqishga xizmat qilishi bilan muhim ahamiyat kasb etdi.
Kamola Yusupova, O‘zA
