“Open Science” platformasi – ilmiy tadqiqotlarni ochiq va shaffof qilishga qaratilgan harakat va texnologiyalar majmuasi bo‘lib, ushbu konsepsiya ilmiy ma’lumotlar, tadqiqot natijalari va tahlil usullarini erkin va ommabop qilib taqdim etishni nazarda tutadi.
Mazkur platforma ilmiy hamkorlik va fikr almashishni rivojlantiribgina qolmasdan, tadqiqotlarning tezroq va samaraliroq amalga oshirilishi va ilm-fan hamda jamiyat o‘rtasidagi aloqalarni mustahkamlashdek afzalliklarga ham ega.
Quvonarlisi shundaki, Namangan davlat universitetida “Open Science” platformasi ochilgan va unda 30dan ortiq kontent yaratilgan. Bu dastur vositasida xalqaro reytinglarda munosib ishtirokni ta’minlash maqsadida 11 ta indikatordan iborat “KPI” baholash tizimi ishlab chiqilgan. Universitetda ana shu tizim vositasida tegishli ko‘rsatkichlarni qayd etgan barcha fakultetlar, kafedralar va professor-o‘qituvchilarni taqdirlash marosimi bo‘lib o‘tdi.
Tantanali tadbirda NamDU rektori, pedagogika fanlari doktori, professor Sobitxon Turg‘unov yig‘ilganlarni Navro‘z umumxalq bayrami bilan tabriklab, yuqori ilmiy natijalarga erishayotgan fakultet dekanlari, kafedra mudirlari va professor-o‘qituvchilarga alohida minnatdorlik bildirdi.
Joriy yilning birinchi choragi davomidagi ko‘rsatkichlarga asosan, universitet miqyosida biotexnologiya fakulteti birinchi, fizika-matematika fakulteti ikkinchi, iqtisodiyot fakulteti esa uchinchi o‘rinlarni egalladi va ularning dekanlariga pul mukofotlari taqdim qilindi.
Bundan tashqari, tadbirda yuqori natijalarga erishgan uch nafar kafedra mudirlari va boshqa fakultetlarning o‘n nafar professor-o‘qituvchining ham mukofotlangani e’tirof etildi. Qolaversa, ushbu tizim bo‘yicha reyting ko‘rsatkichlaridan kelib chiqib, boshqa fakultetlar mas’ul xodimlari hamda professor-o‘qituvchilari ham moddiy rag‘batlantirildi.
Bunday samimiy rag‘bat va e’tibor oliy ta’lim muassasasi ilmiy salohiyatini oshirishda muhim ahamiyat kasb etishi, shubhasiz. Zero, shaffof natija va ko‘rsatkichlar nafaqat professor-o‘qituvchilarni, balki yosh tadqiqotchilarni ham yangi izlanishlar sari ruhlantiradi.
Oqilxon Dadaboyev, O‘zA
