Quyidagilar Institutning asosiy vazifalari hisoblanadi:
Respublika kengashining ishchi organi vazifasini bajarish;
Respublika kengashi, tarmoq kengashlari va malakani baholash markazlari faoliyatini tashkiliy-uslubiy, ekspert va tahliliy jihatdan taʼminlash;
tarmoq malaka ramkalari, kasbiy standartlar va baholash vositalarining ishlab chiqilishi boʻyicha umumiy nazoratni amalga oshirish, ularni ekspertizadan oʻtkazish va joriy etish boʻyicha faoliyatni muvofiqlashtirish;
taʼlim dasturlarini tegishli kasbiy standartlar yoki malaka talablariga muvofiqligi boʻyicha ekspertizadan oʻtkazish va xulosalar berish;
malakani baholash markazlarini akkreditatsiyadan oʻtkazish, faoliyatini monitoring qilish, ularning reestrini yuritish va zarur hollarda ularga metodik yordam koʻrsatish;
Milliy malakalar tizimining yagona raqamli platformasini ishlab chiqish, texnik jihatdan qoʻllab-quvvatlash, boshqa axborot tizimlari bilan integratsiya qilish, shuningdek milliy malaka tizimi masalalari boʻyicha maʼlumotlarni kiritish, tahlil qilish va qayta ishlashni amalga oshirish;
Milliy malaka tizimini rivojlantirish va takomillashtirish boʻyicha taklif va tavsiyalar ishlab chiqish hamda bu borada metodologik xizmatlar koʻrsatish;
tarmoq kengashlari aʼzolari va malakani baholash markazlari xodimlarining malakasini oshirish;
tasdiqlangan malakaga ega shaxslar milliy reestrini hamda kasbiy standartlar reestrini shakllantirish va yuritish;|
vazirlik va idoralardagi kasbiy malakalarni rivojlantirishga masʼul boʻlgan mutaxassislar faoliyatini muvofiqlashtirish va ularga amaliy yordam berish.
Institut oʻziga yuklangan vazifalarni bajarish uchun quyidagi funksiyalarni bajaradi:
a) Respublika kengashining ishchi organi vazifasini bajarish sohasida:
Respublika kengashi yigʻilishlarini tashkil qiladi, yigʻilish materiallari va takliflarni tayyorlaydi, yigʻilish bayonlarini shakllantiradi;
milliy malaka tizimining holati va rivojlanishining monitoringini olib boradi;
malaka tizimining ishtirokchilari sifatida oʻziga yuklatilgan vazifalar buzilishiga yoʻl qoʻyayotgan Tarmoq kengashlari masʼullarining javobgarligi masalasini koʻrib chiqish boʻyicha Respublika kengashiga takliflar kiritadi;
Respublika kengashi tomonidan belgilanadigan boshqa tegishli topshiriqlarni amalga oshiradi.
b) Respublika kengashi, tarmoq kengashlari va malakani baholash markazlari faoliyatini tashkiliy-uslubiy, ekspert va tahliliy jihatdan taʼminlash sohasida:
tarmoq kengashlarining, shu jumladan kasbiy standartlarni ishlab chiqish va amaliyotga tatbiq etish borasidagi faoliyatini uslubiy, tashkiliy va axborot jihatidan taʼminlaydi;
milliy malaka tizimi joriy etish va rivojlantirish boʻyicha amalga oshirilgan ishlar holatini monitoringini amalga oshirish koʻrsatkichlari tizimi va metodikasini ishlab chiqadi;
qonunchilikka muvofiq kasbiy malakalar sohasidagi uslubiy qoʻllanmalar, nizomlar, tartiblar va boshqa normativ hujjatlarni ishlab chiqadi, shuningdek vakolati doirasida tasdiqlaydi.
v) tarmoq malaka ramkalari, kasbiy standartlar va baholash vositalarining ishlab chiqilishi boʻyicha umumiy nazoratni amalga oshirish, ularni ekspertizadan oʻtkazish va joriy etish boʻyicha faoliyatni muvofiqlashtirish sohasida:
Tarmoq kengashlari tomonidan tarmoq malaka ramkalarini ishlab chiqilishini tashkil etadi, ekspertizadan oʻtkazadi, monitoringini yuritadi hamda ularni takomillashtirish boʻyicha takliflar ishlab chiqadi;
kasbiy standartlarni ishlab chiqish va joriy etish boʻyicha faoliyatni muvofiqlashtiradi, kasbiy standartlar loyihalarini ekspertizadan oʻtkazadi hamda takomillashtirish boʻyicha takliflar ishlab chiqadi;
malakani baholash markazlari tomonidan baholash vositalarini ishlab chiqish va joriy etish boʻyicha faoliyatni muvofiqlashtiradi, ekspertizadan oʻtkazadi hamda takomillashtirish boʻyicha takliflar ishlab chiqadi.
g) Taʼlim dasturlarini tegishli kasbiy standartlar yoki malaka talablariga muvofiqligi boʻyicha xulosalar berish sohasida:
kasbiy, oliy va oliy taʼlimdan keyingi taʼlim, kasb-hunarga oʻqitish, qayta tayyorlash va malaka oshirish boʻyicha taʼlim dasturlarini tegishli kasbiy standartlar yoki malaka talablari asosida ishlab chiqish boʻyicha tavsiyalar tayyorlaydi;
ishlab chiqilgan va tasdiqlangan kasbiy standartlar va malaka talablaridan taʼlim tashkilotlari va malakani baholash markazlari erkin foydalanish imkonini yaratadi.
d) malakani baholash markazlarini akkreditatsiyadan oʻtkazish, faoliyatini monitoring qilish, ularning reestrini yuritish va zarur hollarda ularga metodik yordam koʻrsatish sohasida:
norasmiy va informal taʼlim natijalarini mustaqil baholash (tasdiqlash, tan olish, validatsiya qilish) tizimini shakllantirish, shu jumladan malakani baholash markazlari faoliyatini tashkil qilishda ishtirok etadi;
malakani baholash markazlarini akkreditatsiyadan oʻtkazadi, ularning monitoringi va reestrini yuritadi hamda vakolati doirasida ularni nazorat qiladi;
malakani baholash markazlari baholovchilari reestrini yuritadi;
ishchi kasb egalariga malaka razryadlarini berish tizimi faoliyatini muvofiqlashtiradi.
e) Milliy malakalar tizimining yagona raqamli platformasini ishlab chiqish, texnik jihatdan qoʻllab-quvvatlash, boshqa axborot tizimlari bilan integratsiya qilish, shuningdek milliy malaka tizimi masalalari boʻyicha maʼlumotlarni kiritish, tahlil qilish va qayta ishlashni amalga oshirish sohasida:
Milliy malaka tizimining yagona raqamli platformasini ishlab chiqish, yuritish va rivojlantirish ishlarini tashkil etadi;
foydalanuvchilarga tarmoq kengashlari, milliy va tarmoq malaka ramkalari, Mashgʻulotlarning milliy klassifikatori, tasdiqlangan kasbiy standartlar, ekspertizadan oʻtkazilgan va amalga kiritilgan taʼlim dasturlari reestri, malakani baholash markazlari toʻgʻrisidagi maʼlumotlar, malaka tizimini rivojlantirish boʻyicha normativ-huquqiy hujjatlar va metodik qoʻllanmalar bilan erkin tanishish va ulardan foydalanish imkonini yaratadi;
raqamli platformada kasbiy standartlar loyihalarini ishlab chiqish, muhokamadan oʻtkazish va manfaatdor tomonlar bilan kelishish tizimini yoʻlga qoʻyadi;
talabgorlar tomonidan malakani baholash uchun ariza berish, imtihon natijalari toʻgʻrisida maʼlumot olish hamda malakani baholash markazlari qarori ustidan apellyatsiya berish imkoniyati yaratiladi.
j) Milliy malaka tizimini rivojlantirish va takomillashtirish boʻyicha taklif va tavsiyalar ishlab chiqish hamda bu borada metodologik xizmatlar koʻrsatish sohasida:
inson kapitali, kasbiy taʼlimni va xodimlarning malaka darajalarini rivojlantirish boʻyicha takliflar ishlab chiqadi;
tarmoq malaka ramkalari, kasbiy standart va baholash vositalarini ishlab chiqish boʻyicha uslubiy tavsiyalar tayyorlaydi;
mehnat bozori monitoringi asosida tarmoqlarning malaka va bilimlarga boʻlgan ehtiyojlari va tendensiyalarini oʻrganadi;
yoshlarni kasbga yoʻnaltirish, professiogramma va axborot materiallarini ishlab chiqish ishlarini tashkil etishda qatnashadi;
mashgʻulotlar, lavozimlar va kasblar klassifikatorlarini, taʼlim tizimi klassifikatorlari va standartlarini takomillashtirish hamda mehnatga haq toʻlashga oid meʼyorlarni belgilash boʻyicha takliflar tayyorlaydi.
z) tarmoq kengashlari aʼzolari va malakani baholash markazlari xodimlarining malakasini oshirish sohasida:
tarmoq kengashlarining kasbiy malakalarni rivojlantirish boʻyicha masʼul mutaxassislari, ekspert va kasbiy standartlarni ishlab chiqishga masʼul xodimlari uchun kurslar tashkil qiladi;
malakani baholash markazlarining ekspertlari va baholovchilari uchun kurslar tashkil qiladi;
qonunchilikka muvofiq boshqa turdagi malaka oshirish kurslarini tashkil qiladi.
k) tasdiqlangan malakaga ega shaxslar milliy reestrini hamda kasbiy standartlar reestrini shakllantirish va yuritish sohasida:
Respublika kengashi tomonidan oʻrnatilgan tartibda tasdiqlangan kasbiy standartlar reestrini joriy etadi;
malakalarni baholash faoliyati bilan shugʻullanuvchi yuridik shaxslar reestrini hamda tasdiqlangan malakaga ega shaxslar milliy reestrini joriy etish, Milliy malaka tizimining yagona raqamli platformasida yuritish va rivojlantirish ishlarini tashkil etadi;
l) vazirlik va idoralardagi kasbiy malakalarni rivojlantirishga masʼul boʻlgan mutaxassislar faoliyatini muvofiqlashtirish va ularga amaliy yordam berish sohasida:
vazirlik va idoralardagi kasbiy malakalarni rivojlantirishga masʼul boʻlgan mutaxassislar faoliyatini muvofiqlashtiradi, ularga amaliy yordam beradi, samaradorligi va natijadorligi yuqori boʻlgan masʼul mutaxassislarni ragʻbatlantirish va mukofotlash boʻyicha Respublika kengashiga takliflar kiritadi.
